Ивона Кочов e родена во Битола, и е посветена на фотографијата од своето детство. Во 90-тите години, со поддршка од признатиот фотограф Атанас Нашоку Саку, почнала да се занимава со аналогна фотографија. По неколку години активно фотографирање, поради недостиг на средства и обврски кон факултетот, Ивона го ставила своето хоби во позадина. Со појавата на дигиталната технологија во 2009 година, повторно се вратила кон фотографијата и во 2013 година купила „Никон“ DSLR фотоапарат. Ова ја водело до зачленување во Фото-кино клуб „Битола“ и посериозен пристап кон уметничката фотографија, што резултирало со многу награди во следните години.
Изложбата на Ивона Кочов, насловена како „Монохроматска меланхолија“, е вистинско уметничко патување низ секојдневниот живот, претставен преку 40 црно-бели фотографии. Секоја фотографија е уникатен отслик на реалниот живот, замрзнат во време и простор.
Голем дел од фотографиите се направени на Широкиот сокак во Битола, место во кое чука срцето на градот и кое Ивона го користи како своја лична платформа за изразување. Таа успева да ги фати моментите на секојдневниот живот со неверојатна прецизност и емоционална длабочина, како што тоа може да се воочи на фотографиите „А јас“ и „Слобода“. Дел од фотографиите го опишуваат волшебниот свет на децата, нивната безгришност и внатрешен свет. Ивона со својата камера успева да влезе во нивната интима и да ја претстави на начин што го допира срцето на секој кој ги гледа овие фотографии. Така, фотографијата „Ана“ е портрет на девојче кое со својата невиност и чистота го осветлува просторот околу неа. Фотографијата „Венди и Петар Па“ пак е магичен приказ на детската игра и фантазија, додека пак „Вероника и јас“ ја отсликува симбиотската врска помеѓу авторот уметник и неговиот модел. Интересно е да се забележи дека на дел од фотографиите на Ивона, главен субјект се домашните животни како кучињата и коњите. Ова дава импресија дека авторката сака да ја прикаже лојалноста и пријателството што може да се развие помеѓу човекот и неговите домашни миленици. Преку фотографиите „Коњаница“ и „Коњи“ се прикажани моменти на взајмно почитување и разбирање, истовремено откривајќи ја силата и грацијата на овие величествени животни. Оваа тема е уште еден доказ за нејзината способност да ги забележи и прикаже различните емотивни аспекти на животот во своите дела.
Во целост, изложбата „Монохроматска меланхолија“ е вистинско уживање за очите и душата. Ивона Кочов со својата уметност успева да ги претстави обичните моменти од животот на начин што е истовремено емоционален и интимен.
Стефан Илиевски
