Во рамките на меѓународниот фестивал на фотографија SARMATES 4, кој се одржува во Параќин, Србија, своето уметничко присуство го остави и македонскиот фотограф Виктор Трајковски. На втората фестивалска вечер, публиката имаше можност да ја проследи изложбата „Street Life“ – авторска серија која веќе третпат се поставува пред јавноста, овојпат во просториите на RISC центарот.
Изложбата привлече голем број посетители – фотографи, уметници и љубопитни минувачи – кои имаа ретка можност да нурнат во уличниот живот низ објективот на Трајковски.
Неговата фотографија не бележи објекти, таа бележи импулси – моменти на човечност, симболика и урбан поетски ритам. „Street Life“ не е само документ на јавен простор, туку визуелен запис на културна пулсација, каде секој кадар претставува раскажување без зборови.
Серијата претставува улична сцена од повеќе градови низ светот – од Амстердам и Париз, до Истанбул, Токио и Кочани – низ поглед што е истовремено сензитивен и храбар.
Националната фото унија на Македонија со особена гордост ја поздравува оваа интернационална презентација и му честита на Виктор Трајковски за успешното претставување на македонската уметничка фотографија на престижниот фестивал во Параќин. Благодарност и до организаторите на Sarmates 4 за можноста што ја нудат на фотографите од регионот да се поврзат, изложуваат и инспирираат.
