На 6 јуни 2025 година, во галеријата на НУЦК „Марко Цепенков“ – Прилеп, со почеток во 18:00 часот, љубителите на уметноста ќе имаат можност да присуствуваат на несекојдневна визуелна нарација низ објективот на Тони Трипуноски – Геџо, под наслов „Поезија во движење“.
Тони Трипуноски е роден во Прилеп во 1968 година, а неговото патување го носи далеку – во мултикултурната австралиска метропола Мелбурн. Иако по професија е бербер и со децении го гради својот занает под името „Tony the Barber“, неговиот внатрешен порив за креативен израз го води и кон светот на фотографијата. Првите кадри ги бележи со култната Leica M6, црпејќи инспирација од уличниот живот во квартот Footscray – преполн со луѓе, бои, култури и непрекинато движење. Подоцна преминува на дигиталната Leica M262, но суштината на неговото творештво останува иста: фотографија која не е само слика, туку сведоштво. Момент замрзнат во време кој раскажува приказна.
Геџо не бара совршена поза или спектакуларен пејзаж – тој ја бара вистината во секојдневието. Брчките на едно лице, спонтаниот поглед, насмевката од продавница – сè станува поезија кога низ неговиот објектив ќе биде уловен „одлучувачкиот миг“. Неговата работа претставува омаж на човечката природа: сурова, спонтана, трогателна. Посебна димензија на неговиот пристап му дава фактот што работи како бербер – место каде секој човек влегува со своја приказна, а Геџо учи да ја чита токму од лицето. Токму таа чувствителност и внимателност кон изразот, кон човекот, ја претвораат неговата фотографија во интимно сведоштво за животот.
Неговите фотографии не се наметливи – тие тивко ве повикуваат да ги погледнете подлабоко. Тие се рамки исполнети со живот, со минливи чувства и нераскажани приказни, уловени помеѓу два здивa на градот. Изложбата „Поезија во движење“ претставува збирка на токму тие моменти – каде улицата станува сцена, човекот главен лик, а светлината единствениот режисер.
Ве покануваме да бидете дел од ова визуелно патување – да ги запознаете луѓето што Геџо ги сретнал, да ја почувствувате енергијата на Footscray, и пред сè, да ја доживеете фотографијата како поезија на секојдневието.
📅 06.06.2025
🕕 18:00 часот
📍 Галерија при НУЦК „Марко Цепенков“, Прилеп